tīkṣṇapāṣāṇasattvaṃ ca drutavaṅge drutaṃ kṣipet ⁄
catuḥṣaṣṭitamāṃśena stambhamāyāti niścitam ⁄⁄

raktapāradabhāgaikaṃ bhāgaikaṃ śaṃkhacūrṇakam ⁄
śvetābhrakasya sattvaṃ ca samyagbhāgadvayaṃ bhavet ⁄⁄
ṭaṃkaṇasya ca bhāgaikaṃ sarvametaddinatrayam ⁄
vajrīkṣīreṇa saṃmardyamevaṃ vārāṃścaturdaśa ⁄⁄
anena śatamāṃśena drutaṃ vaṅgaṃ ca vedhayet ⁄
stambhate nātra saṃdehastāraṃ bhavati śobhanam ⁄⁄

devadālīphalaṃ mūlamīśvarīrasa eva ca ⁄
toyena marditaṃ kṛtvā vaṅgaṃ stambhayati kṣaṇāt ⁄⁄

raktacitrakacūrṇena vaṅgas tāpais tribhis tribhiḥ ⁄
sarvadoṣavinirmuktaḥ stambhamāyāti tatkṣaṇāt ⁄⁄