jambīrapayasā śudhyetkāsīsaṃ ṭaṅkaṇādyapi ⁄⁄

kaṃkuṣṭhaṃ gairikaṃ śaṃkhaṃ kāśīśaṃ ṭaṅgaṇaṃ tathā ⁄
nīlāñjanaṃ śuktibhedāḥ śulbakāḥ savarāṭakāḥ ⁄⁄
jambīravāriṇā svinnāḥ kṣālitāḥ koṣṇavāriṇā ⁄
śuddhimāyāntyamī yojyā bhiṣagbhiryogasiddhaye ⁄⁄

ādau ṭaṅkaṇamādāya kāñjikāmle vinikṣipet ⁄
ekarātrātsamuddhṛtya raudrayantre vibhāvayet ⁄⁄
naramūtragataṃ ṭaṃgaṃ gavāṃ mūtragataṃ tathā ⁄
dinānte tatsamuddhṛtya jambīrāmbugataṃ tataḥ ⁄⁄
jambīrāmlāt samuddhṛtya nārikelasya pātrake ⁄
marīcacūrṇasaṃyuktaṃ kṣālayecchītalāmbunā ⁄
evaṃ ṭaṅkaṃ samādāya sarvarogeṣu yojayet ⁄⁄