vaṅgaṃ satālamarkasya piṣṭvā dugdhena taṃ puṭet ⁄
śuṣkāśvatthabhavairvalkaiḥ saptadhā bhasmatāṃ vrajet ⁄⁄

ābhīraṃ śodhayedādau drāvayeddhaṇḍikāntare ⁄⁄
apāmārgacaturthāṃśaṃ cūrṇitaṃ melayettataḥ ⁄
sthūlāgrayā lohadarvyā śanaistad avacālayet ⁄⁄
yāvadbhasmatvamāyāti tāvanmardyaṃ ca pūrvavat ⁄
tata ekīkṛtaṃ sarvaṃ bhavedaṅgāravarṇakam ⁄⁄
nūtanena śarāveṇa rodhayedantare bhiṣak ⁄
paścāttīvrāgninā pakvaṃ vaṅgabhasma bhaveddhruvam ⁄⁄

vaṅgaṃ kharparake kṛtvā cullyāṃ saṃsthāpayet sudhīḥ ⁄
dravībhūte punastasmin cūrṇānyetāni dāpayet ⁄⁄
prathame rajanīcūrṇaṃ dvitīye ca yavānikām ⁄
tṛtīye jīvakaṃ caiva tataściñcātvagudbhavam ⁄⁄
aśvatthavalkalotthaṃ ca cūrṇaṃ tatra vinikṣipet ⁄
evaṃ vidhānato vaṅgo mriyate nātra saṃśayaḥ ⁄⁄

satālenārkadugdhena liptvā vaṅgadalānyatha ⁄
bodhiciñcātvacāṃ kṣārairdadyāllaghupuṭāni ca ⁄⁄
mardayitvā caredbhasma tadrasādiṣu śasyate ⁄

pradrāvya kharpare vaṅgaṃ ṣoḍaśāṃśaṃ rasaṃ kṣipet ⁄⁄
svalpasvalpālakaṃ dattvā bhāradvājasya kāṣṭhataḥ ⁄
mardayitvā caredbhasma tadrasādiṣu kīrtitam ⁄⁄

vaṅgapādena sūtena vaṅgapatrāṇi lepayet ⁄
ciñcāvṛkṣasya saṃgṛhya cāntaśchannaṃ ca taṇḍulaiḥ ⁄⁄
piṣṭvā tatpiṇḍamadhye tu vaṅgapatrāṇi lepayet ⁄
śirīṣarajanīcūrṇaiḥ kumāryāḥ śubhagolakam ⁄⁄
sūtaliptaṃ vaṅgapatraṃ golake samalepitam ⁄
ruddhvā gajapuṭe pakvaṃ pūrvasaṃkhyā mṛto bhavet ⁄⁄

mākṣikaṃ haritālaṃ ca palāśasvarasena ca ⁄
kṛtakalkena saṃlipya vaṃgapatrāṇi mārayet ⁄⁄
nāgavacchodhayed vaṅgaṃ tadvadaśvatthaciṃcayoḥ ⁄
tadbhasma haritālaṃ ca tulyamamlena kenacit ⁄⁄
palāśotthadravairvātha golayitvāndhayetpuṭe ⁄
uddhṛtya daśamāṃśena tālena saha mardayet ⁄⁄
pūrvadrāvaiḥ sahāloḍya ruddhvā gajapuṭe pacet ⁄
evaṃ viṃśatpuṭe paktvā mṛtaṃ bhavati bhasmasāt ⁄⁄

akṣabhallātakaṃ toyaiḥ piṣṭvā tāni vilepayet ⁄
tatastilakhalī madhye kṣiptvā ruddhvā puṭe pacet ⁄⁄
gajākhye jāyate bhasma catvāriṃśativaṅgakam ⁄

lohapātre drute vaṅge pādāṃśaṃ tālakaṃ kṣipet ⁄
cālyam aśvatthadaṇḍena jātaṃ bhasma samuddharet ⁄⁄
tadbhasma haritālaṃ tu tulyamamlena mardayet ⁄
palāśakadravairvātha yāmānte coddhṛtaṃ puṭet ⁄⁄
uddhṛtya daśamāṃśena tālena saha mardayet ⁄
pūrvadrāvaistu yāmaikaṃ ruddhvā gajapuṭe pacet ⁄
catvāriṃśatpuṭairevaṃ pakvaṃ syānmṛtavaṅgakam ⁄⁄

tālakaṃ gandhapāṣāṇaṃ mākṣikaṃ kharparaṃ viṣam ⁄
mātuluṅgayutaṃ liptvā vaṅgalohaṃ puṭe pacet ⁄⁄

bhasmasūtapalaikaṃ tu śuddhaṃ vaṅgaṃ pralepayet ⁄⁄
mardayedāyase pātre vaṅgaṃ tu mriyate kṣaṇāt ⁄

athāparaḥ prakāro hi vakṣyate cādhunā mayā ⁄
śuddhabaṃgasya patrāṇi samānyeva tu kārayet ⁄⁄
ajāśakṛt varā tulyā cūrṇitā ca niśā tathā ⁄
caturasram atho nimnaṃ gartaṃ hastapramāṇakam ⁄⁄
kṛtvā chagaṇakaiścārdhaṃ pūrayetsatataṃ bhiṣak ⁄
tataḥ śaṇabhavenāpi vastreṇācchādya gartakam ⁄⁄
pūrvaṃ prakalpitaṃ cūrṇaṃ tatropari ca vinyaset ⁄
tasyopari ca patrāṇi samāni parito nyaset ⁄⁄
cūrṇenācchādya yatnena chagaṇenātha pūrayet ⁄
puṭayedagninā samyak svāṃgaśītaṃ samuddharet ⁄⁄
mṛtaṃ baṃgaṃ tataḥ paścānmardayetpūravāriṇā ⁄
samāṃśaṃ rasasindūram anena saha melayet ⁄⁄
khalve dṛḍhataraṃ piṣṭvā kācakūpyāṃ niveśayet ⁄
vipacedagniyogena yāmaṣoḍaśamātrayā ⁄⁄
hemaprabhaṃ mṛtaṃ baṃgaṃ jāyate rasavaṅgakam ⁄

chāṇopari kṛte garte ciṃcātvakcūrṇakaṃ kṣipet ⁄
karṣamānāṃ baṃgacakrīṃ tatropari nidhāpayet ⁄⁄
cakrīṃ caturguṇenaiva veṣṭitāṃ dhārayettataḥ ⁄
chagaṇena viśuṣkeṇa puṭāgniṃ dāpayettataḥ ⁄⁄
svāṃgaśītaṃ samuddhṛtya sarvakāryeṣu yojayet ⁄
anena vidhinā śeṣamapakvaṃ mārayed dhruvam ⁄⁄

mṛtpātre drāvite vaṅge ciñcāśvatthatvaco rajaḥ ⁄
piṣṭvā vaṅgacaturthāṃśam ayodarvyā pracālayet ⁄⁄
tato dviyāmamātreṇa vaṅgaṃ bhasma prajāyate ⁄
atha bhasmasamaṃ tālaṃ kṣiptvāmlena vimardayet ⁄⁄
tato gajapuṭe paktvā punaramlena mardayet ⁄
tālena daśamāṃśena yāmamekaṃ tataḥ puṭet ⁄
evaṃ daśapuṭaiḥ pakvaṃ vaṅgaṃ bhavati māritam ⁄⁄

pradrāvya kharpare vaṃgaṃ ṣoḍaśāṃśaṃ rasaṃ kṣipet ⁄
svalpasvalpālakaṃ dattvā bhāradvājasya kāṣṭhataḥ ⁄
mardayitvā caredbhasma tadrasādiṣu śasyate ⁄⁄

satālenārkadugdhena liptvā vaṃgadalāni ca ⁄
bodhiciṃcātvacaḥ kṣārairdadyāllaghupuṭāni ca ⁄
mardayitvā caredbhasma tadrasādiṣu śasyate ⁄⁄

vaṅgaṃ satālamarkasya piṣṭvā dugdhena saṃpuṭet ⁄
śuṣkāśvatthabhavair valkaiḥ saptadhā bhasmatāṃ nayet ⁄⁄

bhallātatailasaṃliptaṃ vaṃgaṃ vastreṇa veṣṭitam ⁄
ciṃcāpippalapālāśakāṣṭhāgnau yāti pañcatām ⁄⁄

palāśadravayuktena vaṃgapatraṃ pralepayet ⁄
tālena puṭitaṃ paścānmriyate nātra saṃśayaḥ ⁄⁄

abhrakatālakaśaṅkharasasahitaṃ tatpunaḥ punaḥ puṭitam ⁄
ciñcākṣāravimiśraṃ vaṅgaṃ nirjīvatāṃ yāti ⁄⁄

vaṅgaṃ kharparake kṛtvā cullyāṃ saṃsthāpayetsudhīḥ ⁄
dravībhūte punastasmin cūrṇānyetāni dāpayet ⁄⁄
prathame rajanīcūrṇaṃ dvitīye ca yamānikām ⁄
tṛtīye jīrakaṃ caiva tataściñcātvagudbhavam ⁄⁄
aśvatthavalkalotthaṃ ca cūrṇaṃ tatra vinikṣipet ⁄
evaṃ vidhānato vaṅgaṃ mriyate nātra saṃśayaḥ ⁄⁄

viśuddhavaṅgapatrāṇi drāvayeddhaṇḍikāntare ⁄
apāmārgodbhavaṃ cūrṇaṃ tattulyaṃ tatra melayet ⁄⁄
sthūlāgrayā lauhadarvyā śanais tad abhimardayet ⁄
yāvadbhasmatvamāpnoti tāvanmardyaṃ tu pūrvavat ⁄⁄
tatastvekīkṛtaṃ cūrṇaṃ kṛtvā cāṅgāravarjitam ⁄
nūtanena śarāveṇa rodhayecca bhiṣagvaraḥ ⁄
paścāttīvrāgninā pakvaṃ vaṅgabhasma bhaveddhruvam ⁄⁄