agastipuṣpaniryāsamarditaṃ sūraṇodare ⁄
goṣṭhabhūsthaṃ nabhobhāsaṃ jāyate jalasannibham ⁄⁄

kākāṇḍāphalacūrṇaṃ tu mitrapaṃcakasaṃyutam ⁄
etattulyaṃ ca dhānyābhramamlairmardyaṃ dināvadhi ⁄
aṃdhamūṣāgataṃ dhmātaṃ drutirbhavati nirmalā ⁄⁄

dhānyābhrakaṃ prayoktavyaṃ kākinībījatulyakam ⁄
snuhīkṣīreṇa saptāhaṃ gharme tāpyaṃ drutirbhavet ⁄⁄

dhānyābhrakasamāṃśena cūrṇaṃ guṃjāphalasya tu ⁄
snuhīkṣīreṇa saptāhaṃ bhāvitaṃ dhamanād bhavet ⁄⁄

śuddhakṛṣṇābhrapatrāṇi pīlutailena lepayet ⁄
gharme śoṣyāṇi saptāhaṃ liptvā liptvā punaḥ punaḥ ⁄⁄
tridinaṃ cāmlavargeṇa tadvacchoṣyāṇi cātha vai ⁄
snuhyarkārjunavajrīṇāṃ kaṭutuṃbyā samāharet ⁄⁄
kṣāraṃ kṣāratrayaṃ caitadaṣṭakaṃ cūrṇitaṃ samam ⁄
vajrakaṃdaṃ kṣīrakandaṃ bṛhatī kaṇṭakārikā ⁄⁄
vanavṛntāka eteṣāṃ dravairbhāvyaṃ dinatrayam ⁄
anena kṣārakalkena pūrvapatrāṇi lepayet ⁄⁄
ātape kāṃsyapātre tu sthāpyaṃ lepyaṃ punaḥ punaḥ ⁄
evaṃ dinatrayaṃ kuryād drutirbhavati nirmalā ⁄⁄

saptāhaṃ munitoyena dhānyābhraṃ saiṃdhavaṃ śilā ⁄
mardayedbhāvayed gharme tato dārvī suvarcalam ⁄⁄
maricam abhrapādāṃśaṃ mūrvāpatrarasairdinam ⁄
mardayedvajravallyutthairdravairbhāvyaṃ dināvadhi ⁄⁄
śarāvasaṃpuṭe taṃ tu ruddhvā dhmāte drutirbhavet ⁄⁄

agastyapatraniryāsairmardyaṃ dhānyābhrakaṃ dinam ⁄
tadgolaṃ nikṣipet kaṃde sūraṇotthe nirudhya ca ⁄⁄
tatkaṃdaṃ nikhaned goṣṭhabhūmau māsātsamuddharet ⁄
kaṃdodarād drutirgrāhyā sūtatulyā tu nirmalā ⁄⁄

dhānyābhrakaṃ sagomāṃsam abhrapādaṃ ca saiṃdhavam ⁄
snuhyarkapayasā drāvairmunibhirmardayet tryaham ⁄⁄
tadgolaṃ kadalīkaṃde kṣiptvā bāhye mṛdā lipet ⁄
karīṣāgnau tryahaṃ pacyād drutirbhavati nirmalā ⁄⁄

kākoduṃbarijaiḥ kṣīrairmardyaṃ dhānyābhrakaṃ dinam ⁄
vanamūṣakabījāni tvagvarjyānyabhrakaiḥ samam ⁄⁄
mardayitvārdhayāmaṃ taṃ drāvyaṃ pātālayaṃtrakaiḥ ⁄
ahorātraṃ puṭaṃ deyaṃ drutirbhavati nirmalā ⁄⁄

kapitiṃdujātaphalaiḥ samaṃ dhānyābhrakaṃ dṛḍham ⁄
mardayeddinamekaṃ tu kācakūpyāṃ niveśayet ⁄⁄
narakeśairmukhaṃ ruddhvā kūpikāṃ lepayenmṛdā ⁄
puṭetpātālayaṃtreṇa dinānte drutimāpnuyāt ⁄⁄

raktotpalasya nīlotthadravairmardyaṃ dinatrayam ⁄
dhānyābhrakaṃ dhamedruddhvā vajramūṣāgataṃ dhamet ⁄⁄
vegīphalasya cūrṇena tulyaṃ dhānyābhrakaṃ tryaham ⁄
bhāvyaṃ gharme snuhīkṣīrairdhmātaṃ saṃpuṭagaṃ dravet ⁄⁄

vajravallīdravairmardyaṃ dhānyābhraṃ sasuvarcalam ⁄
tulyaṃ tridinaparyantaṃ tatastaṃ śarāvasaṃpuṭe ⁄⁄
ruddhvā dhmāte dravatyeva rasarūpaṃ na saṃśayaḥ ⁄
ityevaṃ rasarūpaṃ ca jāyate naiva saṃśayaḥ ⁄⁄

uduṃbarodbhavaiḥ kṣīrairabhrapatrāṇi pācayet ⁄
sthālyāṃ vā pācayedetān bhavanti navanītavat ⁄⁄
tatastaṃ vaṭakaṃ kṛtvā chidramūṣāṃ nirudhya ca ⁄
yāmatrayaṃ dhamed gāḍham adhobhāṇḍe drutiḥ patet ⁄⁄

jale dhānyābhrakaṃ tasminnekaviṃśativārakān ⁄⁄
buḍacca rāhayitvātha saṃśoṣyaṃ cātape punaḥ ⁄
rālā syāt ṭaṃkaṇakṣāro lavaṇaṃ kaṇaguggulaḥ ⁄⁄
pratyekaṃ maṇadīpāṃśaṃ caturṇāṃ milito maṇaḥ ⁄
tilānāṃ palagadyāṇā viṃśatiśca guḍasya ca ⁄⁄
vallānāṃ pallikāpīṭhī dvau karṣau madhudugdhayoḥ ⁄
yuktaṃ dhānyābhrakenaiva kṣodanīyaṃ muhurmuhuḥ ⁄⁄
daśa gadyāṇakā mātrāḥ pūpāḥ kāryā anekaśaḥ ⁄
kṣiptvaikāṃ rākṣase yaṃtre tamaṅgāraiśca pūrayet ⁄⁄
ekasyāṃ gālitāyāṃ ca dvitīyāṃ prakṣipetsudhīḥ ⁄
yāmairgālyāḥ kramāt sarvāḥ svāṃgaśītāḥ samuddharet ⁄⁄
tāsāṃ madhyāt samākṛṣyāt drutirabhrakasaṃbhavā ⁄

sukhenāpyanayā yuktyā drutirdhānyābhrakādbhavet ⁄⁄
śvetadhānyābhrakaṃ cūrṇaṃ gadyāṇadvayasaṃmitam ⁄
kṣiptvā dugdhapālīmadhye pātavyaḥ sehulo muhuḥ ⁄⁄
koṣṭikāyāsave kṣepyo yāti so 'nyatrato(?) yathā ⁄
pītvā pītvā hi taddugdhaṃ purīṣaṃ tatra muñcati ⁄⁄
sarvaṃ grāhyaṃ purīṣaṃ tadatītairbahubhirdinaiḥ ⁄
tattolayitvā caturthāṃśaṃ ṭaṃkaṇakṣārajaṃ kṣipet ⁄⁄
tatpiṣṭvājyamadhubhyāṃ ca kṛtaṃ lepasya sannibham ⁄
tena tumbīnalīyantramadhyaṃ lepyaṃ dṛḍhaṃ khalu ⁄⁄
iṃgālaiḥ pūrayitvā tāṃ dhamaṇyā vakravaktrayā ⁄
dhmātavyā yāmamekaṃ ca sā tvavāṅmukhakumpikā ⁄⁄
lepaspheṭhaṃ(?) drutirjātā śvetadhānyābhrakodbhavā ⁄
dvitīyapariṇā tajjñaiḥ kartavyā cābhrakī drutiḥ ⁄⁄

bhramadbhirdṛśyate kvāpi bhāvena śaśako mṛtaḥ ⁄
tasya mastakamadhyācca gṛhītavyo hi mecakaḥ ⁄⁄
dhānyābhrakasya gadyāṇān catvāriṃśat prapeṣayet ⁄
tanmadhyānmecakonmānaṃ cūrṇaṃ prakṣipya mecake ⁄⁄
dvayaṃ saṃmardya saṃmardya piṇḍaṃ kṛtvā dṛḍhaṃ tataḥ ⁄
ghṛtatailādinā digdhā sthālikāyāṃ kṣipecca tam ⁄⁄
pradhvarā ḍhaṅkaṇī deyā nīrandhrā vastramṛtsnayā ⁄
kaṇīnāṃ koṣṭhake kṣepyo rahāpyāhas(?) trisaptakam ⁄⁄
tanmadhye kṛmayo jātā nityaṃ bhakṣyanti cābhrakam ⁄
tāpe ca mecakābhāve mriyante ca bubhukṣayā ⁄⁄
vipannāsu ca sarvāsu śeṣaṃ dhānyābhrakī drutiḥ ⁄
tṛtīyapariṇā tajjñaiḥ khyātā dhānyābhrakā drutiḥ ⁄⁄
vikhyātā yuktayastisraścaturthī nopapadyate ⁄
tisṛṇāṃ yāni karmāṇi vakṣyante tāni sāṃpratam ⁄⁄

gomāṃsasaindhavārkaistu munitoyayutaṃ punaḥ ⁄
kadalīkandakāntaḥsthaṃ gomayāgnau tryahaṃ dravet ⁄⁄

kṛṣṇābhrapatraṃ saṃgṛhya pīlutailena lepayet ⁄
saptāhamātape taptam āmle kṣiptvā dinatrayam ⁄⁄

vajravallīrasaiḥ piṣṭvā vyoma sauvarcalānvitam ⁄
śarāvasaṃpuṭe paktvā dravet salilasannibham ⁄⁄

apāmārgasya pañcāṅgamabhrakaṃ ca supeṣitam ⁄
sthāpayenmṛnmaye pātre tadbhavet salilaṃ yathā ⁄⁄

kākāṇḍīphalacūrṇena drāvakaiḥ pañcabhistathā ⁄
abhrakasya yutaṃ cūrṇaṃ dhmātaṃ mūṣāgataṃ dravet ⁄⁄

kākinībījacūrṇena ghṛṣṭamabhrakajaṃ rajaḥ ⁄
snuhikṣīreṇa saptāhaṃ siktaṃ dhmātaṃ drutaṃ bhavet ⁄⁄

chāgamūtreṇa saṃsiktaṃ kapitindukareṇunā ⁄
abhrakaṃ vāpitaṃ devi jāyate jalasannibham ⁄⁄

agastyapuṣpatoyena piṣṭvā sūraṇakandake ⁄
koṣṭhabhūmigataṃ māsaṃ jāyate rasasannibham ⁄⁄

dhānyāmlake paryuṣitaṃ niculakṣāravāriṇi ⁄
sthitaṃ taddravatāṃ yāti nirleparasasannibham ⁄⁄

śatadhā kañcukīcūrṇaṃ kañcukīrasabhāvitam ⁄
drāvayedgaganaṃ devi lohāni sakalāni ca ⁄⁄

agnijāraṃ nave kumbhe sthāpayitvā dharottaram ⁄
gaganaṃ dravati kṣipraṃ muktāphalasamaprabham ⁄⁄

vegāphalasya cūrṇena samamabhrakajaṃ rajaḥ ⁄
bhāvitaṃ kuliśakṣīre dhmātaṃ dravati tatkṣaṇāt ⁄⁄

narasārarasenaiva kīṭamārīrasena ca ⁄
drāvayedgaganaṃ devi tīkṣṇaṃ lohaṃ ca pannagam ⁄⁄

ekapattrīkṛtaṃ saptadinaṃ munirase kṣipet ⁄
dārvīmaricasaṃmiśraṃ maurvīrasapariplutam ⁄⁄
sauvarcalayuto megho vajravallīrasaplutaḥ ⁄
śarāvasaṃpuṭe dhmāto jāyate jalasannibhaḥ ⁄⁄

ghṛṣṭamabhrakacūrṇaṃ tu kapālīmaricaiḥ saha ⁄
śilayā vāpitaṃ bhūyo'pyagastyarasasaṃyutam ⁄⁄
mārjārapādīsvarasaphalamūlāmlamarditam ⁄
mātuluṅgaphale nyastaṃ vrīhimadhye nidhāpayet ⁄
taddravet pakṣamātreṇa śilāsaindhavayojitam ⁄⁄

svedanauṣadhiniryāsalolitaṃ puṭitaṃ muhuḥ ⁄
mṛtaṃ tu pañcaniculapuṭair bahulapītakam ⁄⁄
piṇḍitaṃ vyoma niṣkledaṃ dattvā sattvaṃ nirañjanam ⁄
umāphalaiśca puṣpaiśca ṣaṣṭikāmlapariplutaiḥ ⁄
aumadaṇḍavimardena gaganaṃ dravati sphuṭam ⁄⁄

kṣīrakandarasaṃ caiva vajrakandarasaṃ tathā ⁄
bṛhatītrayasaṃyuktaṃ kṣāravargaṃ ca lepayet ⁄⁄
kalkenānena liptaṃ tat patrābhraṃ kāṃsyabhājane ⁄
dhamanāt sūryatāpotthāt tridinena drutaṃ bhavet ⁄⁄

athavābhrakapatraṃ tu kañcukīkṣīramadhyagam ⁄
bhāvayecca tathā tena yāvaccūrṇaṃ tato bhavet ⁄⁄
grāhayedabhrapatrāṇi nikṣipyāmle dinatrayam ⁄
lepayettena kalkena kāṃsyapātre nidhāpayet ⁄
sūryatāpena saptāhaṃ drutiḥ saṃjāyate kṣaṇāt ⁄⁄

agastyapuṣpatoyena piṣṭaṃ śūraṇakandagam ⁄
goṣṭhabhūmigataṃ māsaṃ jāyate rasasannibham ⁄⁄