sarvair ebhir lauhair mākṣikamṛditair drutaistathā garbhe ⁄
viḍayogena ca jīrṇe rasarājo bandham upayāti ⁄⁄

raktakañcukikandaṃ tu strīstanyena tu peṣitam ⁄
mūṣāyāṃ pūrvayogena kurute rasabandhanam ⁄⁄

ekavīrākandarase mūkamūṣāgataṃ rasam ⁄
dhamenmukhānilairbaddho bhakṣaṇāya praśasyate ⁄⁄

punaranyaṃ pravakṣyāmi rasabandhaṃ sudurlabham ⁄
narasārarasenaiva kṣaṇād badhyeta sūtakaḥ ⁄⁄

niśācarasya pattrāṇi gṛhṇīyāt sādhakottamaḥ ⁄
adho niṣpīḍitaṃ devi raso bhavati cottamaḥ ⁄⁄
rasaṃ saṃmardya tenaiva dināni trīṇi vārttikaḥ ⁄
āroṭaṃ bandhayet kṣipraṃ gaganaṃ tatra jārayet ⁄⁄
tena pattrarasenaiva sādhayedgaganaṃ punaḥ ⁄

samajīrṇena vajreṇa hemnā ca sahitena ca ⁄
agnistho jārayellohān bandhamāyāti sūtakaḥ ⁄⁄

punaranyaṃ pravakṣyāmi rasabandhaṃ sudurlabham ⁄⁄
trailokyajananī yā syādoṣadhī ajanāyikā ⁄
tasyāḥ samparkamātreṇa baddhastiṣṭhati pāradaḥ ⁄⁄

niśācararase bhāvyaṃ saptavāraṃ tu tālakam ⁄
tenaiva ghātayedvaṅgaṃ vaṅgaṃ tāre tu nirvahet ⁄⁄
taṃ tāraṃ jārayet sūte tatsūtaṃ bandhanaṃ vrajet ⁄
lepamātreṇa tenaiva catuḥṣaṣṭitamo bhavet ⁄⁄

punaranyaṃ pravakṣyāmi rasabandhaṃ sudurlabham ⁄⁄
kaṅkālakhecarī nāma oṣadhī parameśvari ⁄
tasyāstailaṃ tu saṃgṛhya māghakhecarisaṃyutam ⁄
bhāvayet dinamekaṃ tu pātre bhāskaranirmite ⁄⁄
dvitīye vāsare prāpte vajraratnaṃ tu ghātayet ⁄
anale dhāmayettat tu sutaptajvalanaprabham ⁄⁄

punaranyaṃ pravakṣyāmi rasabandhaṃ sudurlabham ⁄⁄
sabījā cauṣadhī grāhyā kācid gulmalatā priye ⁄
mantrasiṃhāsanī nāma dvitīyā devi khecarī ⁄
pātālayantre tattailaṃ gṛhṇīyāttāmrabhājane ⁄⁄
tasya tailasya madhye tu prakṣipet khecarīrasam ⁄
medinīyantramadhye tu sthāpayettu varānane ⁄⁄
pūrvauṣadhyā tu taddevi gaganaṃ medinītale ⁄
rasagrāsaṃ tato dattvā mardanādgolakaṃ kuru ⁄⁄
baddhvā poṭalikāṃ tena gaganaṃ tena jārayate ⁄
same tu gagane jīrṇe baddhastiṣṭhati sūtakaḥ ⁄⁄
bhastrāphūtkārayuktena dhāmyamānena naśyati ⁄
kākaviṣṭhāsamaṃ rūpaṃ samajīrṇasya jāyate ⁄⁄
dviguṇe gagane jīrṇe aṣṭau lohāni saṃharet ⁄⁄

punaranyaṃ pravakṣyāmi rasabandhanam īśvari ⁄⁄
kṣmāpālena hataṃ vajramanenaiva tu kāñcanam ⁄
vajrabhasma hemabhasma tadvai ekatra bandhayet ⁄⁄
niśācararase jāryaṃ narajīvena jārayet ⁄
taṃ sūtaṃ mārayedbhadre gajāridivyakauṣadhī ⁄⁄

mūṣāsthaṃ dhamayet sūtaṃ haṭhāgnau naiva kampate ⁄⁄
jārayet sarvaratnāni baddhaḥ khecaratāṃ nayet ⁄
iti lohe'ṣṭaguṇite jīrṇe syād rasabandhanam ⁄⁄

kevalaṃ tu yadā vajraṃ samajīrṇaṃ tu jārayet ⁄
baddhaḥ sūtastadā jñeyo niṣkampo nirupadravaḥ ⁄⁄
agnistho jāyate sūtaḥ śalākāṃ grasate kṣaṇāt ⁄

vajrakandaṃ samādāya rasamadhye vinikṣipet ⁄
gajendrākhyaṃ puṭaṃ dattvā saptadhā baddhatāṃ nayet ⁄⁄
bhakṣayet taṃ rasaṃ prājñaḥ ṣaṇmāsādamaro bhavet ⁄⁄

abhrakadrutibhiḥ sārdhaṃ sūtakaṃ ca vimardayet ⁄
samāṃśena śilāpṛṣṭhe yāmatrayamanāratam ⁄⁄
kastūrīdhanasārābhyāṃ kṛṣṇāgarusamanvitam ⁄
śarkarālaśunābhyāṃ ca rāmaṭhena ca saṃyutam ⁄⁄
palāśabījasya tathā tatprasūnarasena hi ⁄
tīkṣṇāṃśunātha mṛditaṃ drutibhiḥ saha sūtakam ⁄⁄
milatyeva na saṃdehaḥ kimanyair bahubhāṣitaiḥ ⁄
tato guñjārasenaiva śvetavṛścīvakasya ca ⁄⁄
lāṃgalyāśca rasaistāvadyāvadbhavati bandhanam ⁄⁄
tataḥ prakāśamūṣāyāṃ pañcāṃgārairdhametkṣaṇam ⁄
bandhamāyāti vegena yathā sūryodaye 'mbujam ⁄⁄

vajrāṇāṃ brahmajātīnāṃ drutirvallapramāṇikā ⁄
tolakaṃ śuddhasūtaṃ ca mardayetkanyakārase ⁄⁄
tāvattaṃ mardayetsamyagyāvat piṣṭī prajāyate ⁄
kṛtvā mūṣāṃ samāṃ śuddhāṃ dahanopalanirmitām ⁄⁄
tanmadhye piṣṭikāṃ muktvā piṣṭīmānaṃ viṣaṃ tvaheḥ ⁄
pidhānaṃ tādṛśaṃ kuryānmukhaṃ tenātha rundhayet ⁄⁄
kāṃsyabhājanamadhye tu sthāpayenmūṣikāṃ śubhām ⁄
bhājanāni ca catvāri caturdikṣu gatāni ca ⁄⁄
citraṃ gharmaprasaṃgena bandhamāyāti pāradaḥ ⁄
yāmātkharātape nityaṃ śivenoktam atisphuṭam ⁄⁄
vajradrutisamāyogātsūto bandhanakaṃ vrajet ⁄
sarveṣāṃ sūtabandhānāṃ śreṣṭhaṃ satyamudīritam ⁄⁄

athedānīṃ pravakṣyāmi sūtarājasya bandhanam ⁄
hemadrutiṃ rasendreṇa mardayetsaptavāsarān ⁄⁄
jvālāmukhīrasenaiva dhautaḥ paścācca kāṃjikaiḥ ⁄
pratyahaṃ kṣālayedrātrau rasenoktena vai divā ⁄⁄
aṃdhamūṣāgataṃ paścānmṛdā karpaṭayogataḥ ⁄
lepayetsaptavārāṇi bhūgarte golakaṃ nyaset ⁄⁄
dvādaśāṃgulavistīrṇaṃ dvādaśāṃgulanimnakam ⁄
khātapramāṇaṃ kathitaṃ gurumārgeṇa ca sphuṭam ⁄⁄
tatropari puṭaṃ deyaṃ gajāhvaṃ chagaṇena ca ⁄
yāmadvādaśakenaiva badhyate pāradaḥ svayam ⁄⁄

bhūrjavatsūkṣmapatrāṇi kārayetkanakasya ca ⁄
tānyeva kolamātrāṇi palamātraṃ tu sūtakam ⁄⁄
mardayennimbukadrāvairdinamekamanāratam ⁄
tatastadgolakaṃ kṛtvā kharparopari vinyaset ⁄⁄
culyāmāropaṇaṃ kāryaṃ dhānyāmlena niṣiñcayet ⁄
piṣṭistaṃbhastu kartavyo niyataṃ tridināvadhi ⁄⁄
tato dhūrtarasenaiva svedayetsaptavāsarān ⁄
śvetā punarnavā ciṃcā sahadevī ca nīlikā ⁄⁄
tathā dhūrtavadhūś caiva lāṃgalī suradālikā ⁄
sūtabandhakarā śreṣṭhā proktā nāgārjunādibhiḥ ⁄⁄
etāsāṃ svarasaiḥ paṅkair lepayetsūtagolakam ⁄
triguṇair bhūrjapatraistu veṣṭayettadanaṃtaram ⁄⁄
vastreṇa poṭalīṃ baddhvā svedayenniṃbukadravaiḥ ⁄
yāmatrayaṃ prayatnena dhautaḥ paścād gavāṃ jalaiḥ ⁄⁄
tato dhūrtaphalāntasthaṃ pācayedbahubhiḥ puṭaiḥ ⁄
lāvakākhyaiḥ sumatimān śobhanaḥ sūryakāntivat ⁄

raseṃdraḥ kāntalohaṃ ca tīkṣṇalohaṃ tathaiva ca ⁄
abhrasatvaṃ tathā tāpyasatvaṃ hemasamanvitam ⁄⁄
samāṃśāni ca sarvāṇi mardayennimbukadravaiḥ ⁄
niṣecayedekadinaṃ paścād golaṃ tu kārayet ⁄⁄
pakvamūṣā prakartavyā golaṃ garbhe niveśayet ⁄
gojihvā kākamācī ca nirguṃḍī dugdhikā tathā ⁄⁄
kumārī meghanādā ca madhusaiṃdhavasaṃyutā ⁄
etāsāṃ svarasenaiva svedayedbahuśo bhiṣak ⁄⁄
yāvaddṛḍhatvamāyāti tāvatsvedyaṃ tu golakam ⁄