| śrībhairava uvāca / (1.1) | |
| punaranyaṃ pravakṣyāmi vajrabandhaṃ sureśvari // (1.2) | |
| gandhakaṃ bhakṣayennārī dinānāmekaviṃśatim / (2.1) | |
| tadrajo rasarājasya bandhane jāraṇe hitam // (2.2) | |
| vajrabhasma tu bhāgaikaṃ bhāgāḥ śuddharasās trayaḥ / (3.1) | |
| dvipadī rajasāmardya yāvattat kalkatāṃ gatam // (3.2) | |
| pādāṃśena suvarṇasya pattralepaṃ tu kārayet // (4.0) | |
| vyomavallīrasaṃ kāntaṃ ṭaṅkaṇaṃ ca sucūrṇitam / (5.1) | |
| abhrakamaṣṭamāṃśena khalle kṛtvā vimardayet // (5.2) | |
| naṣṭapiṣṭaṃ catuṣkaṃ tadandhayitvā puṭettataḥ / (6.1) | |
| andhamūṣāgataṃ dhmātaṃ krāmaṇena samanvitam / (6.2) | |
| khoṭastu jāyate devi śatavedhī mahārasaḥ // (6.3) | |
| sauvīraṃ ṭaṅkaṇaṃ kācaṃ dattvā dattvā viśodhayet / (7.1) | |
| ajīrṇe milite hemnā samāvartastu jāyate // (7.2) | |
| ekottarakrame vṛddhyā saṃkalaiḥ krāmayettataḥ // (8.0) | |
| ekaguṇena sūtena ekā saṃkalikocyate / (9.1) | |
| triguṇena tu sūtena dvitīyā saṃkalī bhavet // (9.2) | |
| ṣaḍguṇena tu sūtena tṛtīyā saṃkalī bhavet / (10.1) | |
| daśaguṇena sūtena caturthī saṃkalī bhavet // (10.2) | |
| pañcadaśaguṇeneśi pañcamī saṃkalī bhavet / (11.1) | |
| ekaviṃśadguṇeneśi ṣaṣṭhī saṃkalikā matā // (11.2) | |
| aṣṭāviṃśadguṇeneśi saptamī saṃkalī smṛtā / (12.1) | |
| ṣaṭtriṃśadguṇasambaddhā bhavet saṃkalikāṣṭamī // (12.2) | |
| pañcacatvāriṃśadguṇaiḥ saṃkalī navamī matā / (13.1) | |
| pañcapañcāśadguṇena daśamī saṃkalī smṛtā // (13.2) | |
| evaṃ ca kramavṛddhyāsya saṃkalīdaśabandhanam // (14.0) | |
| prathame daśavedhī syāt śatavedhī dvitīyake / (15.1) | |
| tṛtīye sahasravedhī ca caturthe 'yutavedhakaḥ // (15.2) | |
| pañcame lakṣavedhī syāt daśalakṣaṃ tu ṣaṣṭhake / (16.1) | |
| saptame koṭivedhī ca daśakoṭi tathāṣṭame // (16.2) | |
| dhūmāvaloko navame daśame śabdavedhakaḥ / (17.1) | |
| saṃkalaiḥ saṃkalairbaddho vedho daśaguṇo bhavet // (17.2) | |
| daśasaṃkalikābaddhaḥ śabdavedhī mahārasaḥ / (18.1) | |
| yathā lohe tathā dehe kramate nātra saṃśayaḥ // (18.2) | |
| vedhayettatpramāṇena dhātūṃścaiva śarīrakam / (19.1) | |
| kārayedguṭikāṃ divyāṃ badarāsthipramāṇataḥ // (19.2) | |
| mahākālīṃ pūjayitvā dhārayet satataṃ budhaḥ / (20.1) | |
| tasya mantraṃ pravakṣyāmi tridaśairapi durlabham // (20.2) | |
| praṇavo bhuvaneśībījaṃ lakṣmībījaṃ tataḥ param // (21.0) | |
| oṃ hrīṃ śrīṃ kālikā kāli mahākāli māṃsaśoṇitabhojini / (22.1) | |
| hrīṃ hrīṃ huṃ raktakṛṣṇamukhe devi rasasiddhiṃ dadasva me // (22.2) | |
| śrīṃ hrīṃ aiṃ ramā śaktiśca tārākhyo mantro'yaṃ sarvasiddhidaḥ // (23.0) | |
| pūjayitvā tato devīṃ siddhacakraṃ viśeṣataḥ / (24.1) | |
| tāṃ kṣiped vaktramadhye tu guṭikāṃ divyarūpiṇīm // (24.2) | |
| śatavedhena yā baddhā rasena guṭikā priye / (25.1) | |
| māsamekaṃ tu vaktrasthā jīveccaiva yugāvadhi // (25.2) | |
| tathā sahasravedhena yā baddhā guṭikā śubhā / (26.1) | |
| māsadvayaṃ tu vaktrasthā jīveccandrārkatārakam // (26.2) | |
| daśasahasravedhena baddhā ca guṭikā yadi / (27.1) | |
| śakratulyaṃ tadāyuḥ syāt tribhirmāsairvarānane // (27.2) | |
| lakṣavedhena yā baddhā guṭikā divyarūpiṇī / (28.1) | |
| caturmāsaṃ tu vaktrasthā brahmāyuṣaṃ prayacchati // (28.2) | |
| daśalakṣeṇa yā baddhā guṭikā divyarūpiṇī / (29.1) | |
| pañcamāsaṃ tu vaktrasthā viṣṇutulyāyuṣaṃ labhet // (29.2) | |
| koṭivedhena yā baddhā guṭikā divyarūpiṇī / (30.1) | |
| ṣaṇmāsaṃ saṃsthitā vaktre sākṣādvai rudratāṃ nayet // (30.2) | |
| śatakoṭiprabhedena guṭikā divyarūpiṇī / (31.1) | |
| saptamāsaṃ tu vaktrasthā sa labhedaiśvaraṃ padam // (31.2) | |
| dhūmāvalokane baddhā guṭikā śivarūpiṇī / (32.1) | |
| aṣṭamāsaṃ tu vaktrasthā īśānasya phalaṃ labhet // (32.2) | |
| śabdavedhena yā baddhā guṭikā śivarūpiṇī / (33.1) | |
| navamāsaṃ tu vaktrasthā sa bhavedvyāpako naraḥ // (33.2) | |
| navasaṃkalikābaddhaḥ svayambhurvā maheśvaraḥ / (34.1) | |
| kartā hartā svayaṃ bhoktā śāpānugrahakārakaḥ // (34.2) | |
| sarvajñaḥ sarvakartā ca sūkṣmarūpo nirañjanaḥ / (35.1) | |
| icchayā kurute sṛṣṭimicchayā saṃharejjagat // (35.2) | |
| svacchandagamano bhūtvā viśvarūpo bhavennaraḥ / (36.1) | |
| pūjyate sarvadevaiśca brahmaviṣṇumaheśvaraiḥ // (36.2) | |
| punaranyaṃ pravakṣyāmi vajrabandhaṃ sudurlabham // (37.0) | |
| samāṃśaṃ bhakṣaṇaṃ hema śuddhasūtena kārayet / (38.1) | |
| mṛtavajraṃ palāṃśena mardayeddvipadīrasaiḥ // (38.2) | |
| prāgvaccheṣaṃ purājātaṃ haṃsapādyā vimarditam / (39.1) | |
| bhāvitaṃ puṭitaṃ ratnaiḥ pūrvavat saphalaṃ bhavet // (39.2) | |
| vajrabaddho bhavet siddho devadānavadurjayaḥ / (40.1) | |
| caturviṃśatisiddhānāṃ nāyakaḥ sarvasiddhidaḥ // (40.2) | |
| vajracūrṇasamaṃ sūtaṃ haṃsapādyā vimardayet / (41.1) | |
| puṭitvā mārayettaṃ tu punastulyaṃ rasaṃ kṣipet // (41.2) | |
| dhmātaḥ khoṭo bhavatyāśu śodhitaḥ kācaṭaṅkaṇaiḥ / (42.1) | |
| yāvacchakrodayaprakhyo jāyate sa rasaḥ priye // (42.2) | |
| vajrasattvaṃ ca gaganaṃ rasaṃ hema ca melayet / (43.1) | |
| amaratvamavāpnoti vaktrasthena surādhipe // (43.2) | |
| jārayitvā rasaṃ taddhi punastenaiva jārayet / (44.1) | |
| koṭivedhī na saṃdeho vaktrasthaḥ khecaraṃ padam // (44.2) | |
| vedhayettatpramāṇena dhātuṃ caiva śarīrakam / (45.1) | |
| kārayedguṭikāṃ divyāṃ vajrasiddhena kāñcane // (45.2) | |
| anena kramayogena yāvacchakyaṃ tu mārayet / (46.1) | |
| tadbhasmasūtakaṃ devi sarvaroganibarhaṇam // (46.2) | |
| hemnā ca sārayitvādau candrārkaṃ lepayettataḥ / (47.1) | |
| dvātriṃśāṃśena hemārdhaṃ mātrikābhyadhikaṃ bhavet // (47.2) | |
| badarāsthipramāṇena kārayedguṭikāṃ budhaḥ / (48.1) | |
| yathā lohe tathā dehe kramate nānyathā kvacit // (48.2) | |
| vajreṇa dvaṃdvitaṃ hema kāntaśulvakayojitam / (49.1) | |
| rañjayet saptavārāṇi taṃ khoṭaṃ sūkṣmacūrṇitam // (49.2) | |
| bhāvitaṃ strīrajasyeva guñjāpañcamitaṃ yutam / (50.1) | |
| bhūrjapattre niveśyātha baddhvā vastreṇa poṭalīm / (50.2) | |
| svedayeddevadeveśi yāvadbhavati golakam // (50.3) | |
| lāṅgalī jīvakaścaiva mustāyuktendravāruṇī / (51.1) | |
| eteṣāṃ nikṣipet piṇḍe vajragolaṃ tu veṣṭayet // (51.2) | |
| mūṣāmadhye tu nikṣipya andhayitvā prayatnataḥ / (52.1) | |
| bhūmau mūṣāṃ vinikṣipya puṭaṃ mūrdhni pradāpayet // (52.2) | |
| anenaiva pradānena bandhameti mahārasaḥ // (53.0) | |
| golakaṃ dhārayedvaktre varṣamekaṃ yadi priye / (54.1) | |
| jīvet kalpasahasrāṇi yathā nāgo mahābalaḥ // (54.2) | |
| varṣairdvādaśabhiḥ sākṣāt rudrarūpastu jāyate / (55.1) | |
| gātrasya tasya prasvedāt aṣṭau lohāstu kāñcanam // (55.2) | |
| vajrabhasma tathā sūtaṃ kāñcanena samanvitam / (56.1) | |
| vaktrasthaṃ kurute yastu so 'bdāt palitavarjitaḥ // (56.2) | |
| kṛṣṇābhrakasya sattvaṃ ca tāraṃ tāmraṃ ca hāṭakam / (57.1) | |
| mākṣikaṃ kāntatīkṣṇaṃ ca samabhāgāni kārayet // (57.2) | |
| andhamūṣāgataṃ dhmātaṃ khoṭo bhavati tatkṣaṇāt / (58.1) | |
| taṃ khoṭaṃ sūkṣmacūrṇaṃ tu drutasūtena golakam // (58.2) | |
| mṛtavajrasya bhāgaikaṃ bhāgāś catvāri golakam / (59.1) | |
| mardayettaptakhallena bhasmībhavati sūtakaḥ // (59.2) | |
| mārayedbhūdhare yantre saptasaṃkalikākramāt / (60.1) | |
| guñjāmātraṃ tu tadbhasma madhvājyena tu lehayet // (60.2) | |
| saṃvatsaraprayogeṇa hy ayutāyur bhavennaraḥ / (61.1) | |
| valīpalitanirmukto mahābalaparākramaḥ // (61.2) | |
| tadbhasmapalam ekaṃ tu palaikaṃ gandhakasya ca / (62.1) | |
| andhamūṣāgataṃ dhmātaṃ khoṭo bhavati tatkṣaṇāt // (62.2) | |
| jīvet kalpasahasrāṇi yathānaṅgo mahābalaḥ / (63.1) | |
| tasya mūtrapurīṣeṇa lohānyaṣṭau ca kāñcanam // (63.2) | |
| taṃ khoṭaṃ rañjayet paścāt vaṅgābhrakakapālinā / (64.1) | |
| rañjayet saptavārāṇi bhavet kuṅkumasaṃnibham // (64.2) | |
| hemnā saha samāvartya sāraṇātrayasāritam / (65.1) | |
| sahasrāṃśena tenaiva sarvalohāni vedhayet // (65.2) | |
| kṛṣṇābhrakasya sattvaṃ ca tāraṃ tāmraṃ ca hāṭakam / (66.1) | |
| tīkṣṇaṃ ca baddhasūtaṃ ca mākṣikaṃ ca samanvitam // (66.2) | |
| andhamūṣāgataṃ dhmātaṃ khoṭo bhavati tatkṣaṇāt / (67.1) | |
| hemnā saha samāvartya sāraṇātrayasāritam // (67.2) | |
| śatāṃśena tu tenaiva śulvavedhaṃ pradāpayet / (68.1) | |
| jāyate kanakaṃ divyaṃ devābharaṇabhūṣaṇam // (68.2) | |
| baddhasūtasya bhāgaikaṃ bhāgaikaṃ pannagasya ca / (69.1) | |
| hāṭakasya ca bhāgaikaṃ bhāgaikaṃ cābhrakāntayoḥ // (69.2) | |
| ekīkṛtya tu taddhāmyaṃ rase jīrṇe tu jārayet / (70.1) | |
| śatāṃśena tu tenaiva śulvavedhaṃ pradāpayet // (70.2) | |
| baddhasūtasya bhāgaikaṃ bhāgaikaṃ kuṭilasya ca / (71.1) | |
| andhamūṣāgataṃ dhmātaṃ khoṭo bhavati tatkṣaṇāt // (71.2) | |
| tasya khoṭasya bhāgaikaṃ bhāgaikaṃ gandhakasya ca / (72.1) | |
| andhamūṣāgataṃ dhmātaṃ yāvadvaṅgāvaśeṣitam // (72.2) | |
| anena kramayogena vaṅgaṃ nirvāpya ṣaḍguṇam / (73.1) | |
| anena kramayogena vahennāgaṃ ca ṣaḍguṇam // (73.2) | |
| tadrasaṃ rañjayetpaścāt tīkṣṇaśulvakapālinā / (74.1) | |
| rañjayet tat prayatnena yāvat kuṅkumasaṃnibham // (74.2) | |
| hemnā saha samāvartya sāraṇātrayasāritam / (75.1) | |
| śatāṃśe vedhayet śulvaṃ divyaṃ hema prajāyate // (75.2) | |
| punaranyaṃ pravakṣyāmi dravasaṃskāramuttamam // (76.0) | |
| rañjayet śuddhakanakaṃ tīkṣṇaśulvakapālinā / (77.1) | |
| pakvabījasya bhāgaikaṃ bhāgaikaṃ drutasūtakam / (77.2) | |
| mardayenmadhyamāmlena golakaṃ bhavati kṣaṇāt // (77.3) | |
| mṛtavajrasya bhāgaikaṃ bhāgāś catvāri golakam / (78.1) | |
| mardayet taptakhallena bhasmībhavati sūtakam // (78.2) | |
| mārayedbhūdhare yantre saptasaṃkalikākramāt / (79.1) | |
| tadbhasma tu punaḥ paścāt madhyamāmlena mardayet // (79.2) | |
| puṭaṃ dadyāt prayatnena ṣaṣṭyādhikaśatatrayam / (80.1) | |
| tadbhasma jāyate divyaṃ sindūrāruṇasaṃnibham // (80.2) | |
| tenaiva vedhayettāraṃ sahasrāṃśena kāñcanam / (81.1) | |
| mṛtavajrasya bhāgaikaṃ bhāgāḥ ṣoḍaśa sūtakam // (81.2) | |
| devadālīśaṅkhapuṣpīrasena marditaṃ kramāt / (82.1) | |
| mārayedbhūdhare yantre bhasmībhavati tatkṣaṇāt // (82.2) | |
| phūtkārāṇāṃ sahasreṇa dhāmyamāno na gacchati / (83.1) | |
| īdṛśaṃ bhasmasūtaṃ ca dehe lohe ca yojayet // (83.2) | |
| tadbhasmapalamekaṃ tu palamekaṃ tu gandhakam / (84.1) | |
| andhamūṣāgataṃ dhmātaṃ khoṭo bhavati tatkṣaṇāt // (84.2) | |
| taṃ khoṭaṃ rañjayet paścāt kāpālikramayogataḥ / (85.1) | |
| sāraṇātrayayogeṇa śulvavedhaṃ pradāpayet // (85.2) | |
| bhasmasūtapalaikaṃ ca palaikaṃ pannagasya ca / (86.1) | |
| puṭena jāyeta bhasma sindūrāruṇasaṃnibham // (86.2) | |
| tadbhasma tu punaḥ paścād gopittena tu mardayet / (87.1) | |
| tāmrapātreṇa tat kṛtvā mardayellohamuṣṭinā // (87.2) | |
| mṛdvagninā tataḥ pācyaṃ yāvannāgena melanam // (88.0) | |
| tadbhasmabhāgamekaṃ tu bhāgaikaṃ hemagolakam / (89.1) | |
| ekīkṛtyātha saṃmardya krāmaṇena sahaikataḥ // (89.2) | |
| tārāriṣṭaṃ tu tenaiva sahasrāṃśena kāñcanam / (90.1) | |
| anena kramayogeṇa vaṅgabhasma prajāyate // (90.2) | |
| sahasrāṃśena tenaiva śulvavedhaṃ pradāpayet / (91.1) | |
| tacchulvaṃ jāyate tāraṃ śaṅkhakundendusaṃnibham // (91.2) | |
| śvetābhrakasya sattvaṃ ca kāntākāntaṃ tathāyasam / (92.1) | |
| vaṅgaṃ tāraṃ tathā śvetaṃ vaikrāntaṃ ca kadambakam // (92.2) | |
| andhamūṣāgataṃ dhmātaṃ khoṭaṃ kundendusaṃnibham / (93.1) | |
| taṃ khoṭaṃ sūkṣmacūrṇaṃ tu drutasūtena golakam // (93.2) | |
| mṛtavajrasya bhāgaikaṃ bhāgāś catvāri golakam / (94.1) | |
| mardayettaptakhallena bhasmībhavati sūtakaḥ // (94.2) | |
| mārayedbhūdhare yantre saptasaṃkalikākramāt / (95.1) | |
| tataśca jāyate bhasma śaṅkhakundendusaṃnibham // (95.2) | |
| tadbhasma palamekaṃ tu palamekaṃ tu gandhakam / (96.1) | |
| andhamūṣāgataṃ dhmātaṃ khoṭo bhavati tatkṣaṇāt // (96.2) | |
| tāreṇa ca samāvartya sāraṇātrayasāritam / (97.1) | |
| sahasrāṃśena tenaiva śulvavedhaṃ pradāpayet // (97.2) | |
| tīkṣṇasūtapalānyaṣṭau drutasūtapalāṣṭakam / (98.1) | |
| mardayettaptakhallena kuṣṭhachallīrasena ca // (98.2) | |
| tatkṣaṇājjāyate piṇḍaṃ tīkṣṇena saha golakam / (99.1) | |
| mardayettaptakhallena bhasmībhavati tatkṣaṇāt // (99.2) | |
| mārayedbhūdhare yantre saptasaṃkalikākramāt / (100.1) | |
| ṣoḍaśāṃśena tenaiva vaṅgavedhaṃ pradāpayet // (100.2) | |
| tadbhasmapalamekaṃ tu palaikaṃ gandhakasya ca / (101.1) | |
| andhamūṣāgataṃ dhmātaṃ khoṭo bhavati tatkṣaṇāt // (101.2) | |
| tasya khoṭasya bhāgaṃ ca tīkṣṇacūrṇaṃ ca tatsamam / (102.1) | |
| dvau bhāgau drutasūtasya sarvam ekatra mardayet // (102.2) | |
| taptakhalle tu saṃmardya golako bhavati kṣaṇāt / (103.1) | |
| mārayedbhūdhare yantre saptasaṃkalikākramāt // (103.2) | |
| tat sarvaṃ jāyate bhasma śaṅkhakundendusaṃnibham / (104.1) | |
| tadbhasma kārayet khoṭaṃ tīkṣṇena dvaṃdvitaṃ saha // (104.2) | |
| anena kramayogeṇa saptasaṃkalikākramāt / (105.1) | |
| tadbhasma jārayet paścāt sāraṇātrayasāritam // (105.2) | |
| lakṣāṃśena tu tenaiva vaṅgavedhaṃ pradāpayet / (106.1) | |
| bhasmasūtapalaikaṃ tu śuddhaṃ vaṅgaṃ pralepayet // (106.2) | PROC |
| mardayedāyase pātre vaṅgaṃ tu mriyate kṣaṇāt / (107.1) | |
| dvipalaṃ mṛtavaṅgasya tāracūrṇapaladvayam // (107.2) | |
| dvipalaṃ gandhakaṃ dadyāt palaikaṃ ṭaṅkaṇasya ca / (108.1) | |
| andhamūṣāgataṃ dhmātaṃ khoṭo bhavati tatkṣaṇāt // (108.2) | |
| palaikaṃ khoṭacūrṇasya palaikaṃ drutasūtakam / (109.1) | |
| mardayenmātuluṅgāmlaiḥ golako bhavati kṣaṇāt // (109.2) | |
| ṣoḍaśāṃśena tenaiva śulvavedhaṃ pradāpayet / (110.1) | |
| vaṅgasthāne dadennāgaṃ tārasthāne tu kāñcanam // (110.2) | |
| pūrvavat kramayogeṇa rasaṃ khoṭaṃ tu kārayet / (111.1) | |
| taṃ khoṭaṃ sūkṣmacūrṇaṃ tu drutasūtena golakam // (111.2) | |
| ṣoḍaśāṃśena tenaiva tārāriṣṭaṃ tu vedhayet // (112.0) | |
| mṛtavaṅgapalaikaṃ tu palaikaṃ sūtakasya ca / (113.1) | |
| sattvacūrṇapalaikaṃ tu trayamekatra melayet // (113.2) | |
| mardayenmātuluṅgāmlaiḥ golako bhavati kṣaṇāt // (114.0) | |
| mṛtavajrasya bhāgaikaṃ bhāgāś catvāri golakam / (115.1) | |
| ekatra mardayet khalle oṣadhīdravasaṃyutam // (115.2) | |
| mārayedbhūdhare yantre puṭānāṃ saptakena tu / (116.1) | |
| tat sarvaṃ jāyate bhasma vajrasyaiva prabhāvataḥ // (116.2) | |
| sāmudraṃ triphalaṃ devi bhasmamadhye pradāpayet / (117.1) | |
| ekīkṛtyātha saṃmardya vajrīkṣīre dinatrayam // (117.2) | |
| viśvāmitrakapālasthaṃ puṭaṃ dadyāttu bhūdhare / (118.1) | |
| tat sarvaṃ jāyate bhasma śaṅkhakundendusaṃnibham // (118.2) | |
| tenaiva yavamātreṇa vaṅgaṃ stambhayati kṣaṇāt / (119.1) | |
| vaṅgaṃ tāraṃ tathā sattvaṃ samasūtena golakam // (119.2) | |
| anena kramayogeṇa mārayecca pṛthak pṛthak / (120.1) | |
| tat sarvaṃ jāyate bhasma vajrasyaiva prabhāvataḥ // (120.2) | |
| bhasmasūtapalaikaṃ ca vaṅgabhasmapaladvayam / (121.1) | |
| dve pale mṛtatārasya sattvabhasmapaladvayam // (121.2) | |
| śaṅkhacūrṇapalaṃ pañca sāmudrasya palāṣṭakam / (122.1) | |
| ṭaṅkaṇasya palānyaṣṭau sarvam ekatra mardayet // (122.2) | |
| vajrīkṣīreṇa saṃpeṣya puṭaṃ dadyāccaturdaśa / (123.1) | |
| eṣa siddharasaḥ sākṣāt durlabhastridaśairapi // (123.2) | |
| vaṅgaṃ tu drāvayet paścāt bhāṇḍe caiva tu mṛnmaye / (124.1) | |
| siddhaṃ bhasma bhavellohaśalākena ca cālayet // (124.2) | |
| vāpayecca prayatnena yāvat kaṭhinatāṃ vrajet / (125.1) | |
| andhamūṣāgataṃ dhmātaṃ tāraṃ bhavati śobhanam // (125.2) | |
| kadācit puṭite tāre punarvaṅgaṃ pradāpayet / (126.1) | |
| pattre dāhe kaṣe chede tattāraṃ śāśvataṃ bhavet // (126.2) | |
| stambhitaṃ tattu golaṃ ca ṣoḍaśāṃśasamanvitam / (127.1) | |
| mṛtavajrasya bhāgaikam ekatraiva tu mardayet // (127.2) | |
| devadālī śaṅkhapuṣpī tadrasena tu mardayet / (128.1) | |
| mārayedbhūdhare yantre puṭānāṃ saptakena tu // (128.2) | |
| tadbhasma tu punaḥ paścāt dīpayantreṇa pācayet // (129.0) | |
| bhasmasūtapalaikaṃ ca śvetābhrakapaladvayam / (130.1) | |
| śaṅkhacūrṇapalaikaṃ tu palaikaṃ ṭaṅkaṇasya ca / (130.2) | |
| ekīkṛtyātha tat sarvaṃ vajrīkṣīreṇa peṣayet // (130.3) | |
| āraṇyopalakaiḥ paścāt puṭaṃ dadyāccaturdaśa / (131.1) | |
| raso'yaṃ yavamātreṇa vaṅgaṃ stambhayati kṣaṇāt // (131.2) | |
| kṛṣṇābhrakapalaikaṃ tu dve pale mṛtasūtakam / (132.1) | |
| gandhakasya palaṃ caikam ekīkṛtyātha mardayet // (132.2) | |
| mardyamānaṃ prayatnena golakaṃ bhavati kṣaṇāt // (133.0) | |
| mṛtavajrasya bhāgaikaṃ caturbhāgaṃ ca golakam / (134.1) | |
| mardayet praharaikaṃ tu bhasmībhavati sūtakaḥ // (134.2) | |
| āraṇyagomayenaiva puṭaṃ dadyāttu bhūdhare / (135.1) | |
| anena kramayogeṇa saptasaṃkalikāṃ kuru // (135.2) | |
| śatāṃśena tu tenaiva nāgavedhaṃ pradāpayet / (136.1) | |
| taṃ khoṭaṃ rañjayet paścāt śulvābhrakakapālinā // (136.2) | |
| punastaṃ rañjayet paścāt tīkṣṇaśulvakapālinā / (137.1) | |
| punastaṃ rañjayet paścāt nāgābhrākakapālinā // (137.2) | |
| hemnā saha samāvartya sāraṇātrayasāritam / (138.1) | |
| sahasrāṃśena tenaiva śulvavedhaṃ pradāpayet // (138.2) | |
| jāyate kanakaṃ divyaṃ devābharaṇamuttamam // (139.0) | |
| vajrabhasma snuhīkṣīre puṭitaṃ daśabhiḥ puṭaiḥ / (140.1) | |
| tattulyaṃ mardayet sūtaṃ devadālyā rasaiḥ puṭet // (140.2) | |
| tattulyaṃ ca puṭettīkṣṇaṃ triphalāyā rasena tu / (141.1) | |
| tattulyaṃ puṭayennāgamahimārāṭarūṣakaiḥ // (141.2) | |
| hemavarṇapradaṃ taddhi viṃśatyaṃśena yojitam / (142.1) | |
| catuḥṣaṣṭyaṃśakenedaṃ śuddhatāraṃ ca rañjayet // (142.2) | |
| aṣṭamāṃśena tenaiva nāgapattrāṇi lepayet / (143.1) | |
| puṭayenmārayennāgaṃ sindūrāruṇasaṃnibham // (143.2) | |
| tattulyaṃ mārayeddhema kāñcanārarase puṭet / (144.1) | |
| tattulyaṃ mārayecchulvaṃ gṛhakanyārasena ca // (144.2) | |
| paścādamlena puṭayed yāvat sindūrasaṃnibham / (145.1) | |
| candrārkaṃ rañjayettena śatāṃśena tu vedhayet // (145.2) | |
| sabījaṃ bījavarjaṃ vā vajreṇa saha sūtakam / (146.1) | |
| tadbhasma mardayet paścāt svarṇapattrarasena tu // (146.2) | |
| tenaiva vedhayecchulvaṃ śulvaṃ tāre tu yojayet // (147.0) | |
| vajreṇa dvaṃdvayeddhema hemnā ca dvaṃdvayedrasam / (148.1) | |
| rasena dvaṃdvayeddehaṃ sa deho hy ajarāmaraḥ // (148.2) | |
| kadalīkandasauvīraṃ kaṇṭakārīrasaplutam / (149.1) | |
| krāmaṇaṃ sarvadhātūnāṃ sarvadvaṃdveṣu melanam // (149.2) | |
| timirasya tu pañcāṅgaṃ mārjārībījasaṃyutam / (150.1) | |
| ekīkṛtyātha saṃmardya vajraṃ tenaiva vedhayet // (150.2) | |
| vajramūṣāgataṃ dhmātaṃ hemadvaṃdvaṃ tu kārayet // (151.0) | |
| kāntapāṣāṇacūrṇaṃ tu bhūlatā rāmaṭhaṃ madhu / (152.1) | |
| guñjāṭaṅkaṇakācaṃ ca karkaṭāsthi snuhīpayaḥ // (152.2) | |
| etat sarvaṃ samaṃ yojyaṃ strīstanyena ca mardayet / (153.1) | |
| mūṣālepagataṃ prānte vajramelāpakaḥ sukhī // (153.2) | |
| haṭhāgnau vajramūṣāyāṃ dṛḍhavajrā milanti ca / (154.1) | |
| susūkṣmā rajakā bhūtvā hy ekībhāvaṃ vrajanti te // (154.2) | |
| kācaṭaṅkaṇayogena dhmātaḥ śuddhimavāpnuyāt / (155.1) | |
| bahubhiścaiva mūṣābhistejaḥpuñjo 'bhijāyate // (155.2) | |
| mṛtavajrasya bhāgaikaṃ bhāgāḥ ṣoḍaśa hāṭakam / (156.1) | |
| śvetakācasya cūrṇaṃ tu bhāgān ṣoḍaśa dāpayet // (156.2) | |
| andhamūṣāgataṃ dhmātaṃ vajrabandhaṃ tu kārayet / (157.1) | |
| anena kramayogeṇa saptavārāṃśca dāpayet / (157.2) | |
| milate tatkṣaṇaṃ vajraṃ hemnā tu salilaṃ yathā // (157.3) | |
| cūrṇe narakapālasya mṛtavajraṃ tu dāpayet / (158.1) | |
| andhamūṣāgataṃ dhmātaṃ hemnā milati tatkṣaṇāt // (158.2) | |
| bhṛṅgapakṣaṃ nṛkeśaṃ ca mṛtakāntaṃ saṭaṅkaṇam / (159.1) | |
| bālavatsapurīṣaṃ ca strīstanyena ca peṣayet // (159.2) | |
| mūṣālepaṃ tataḥ kṛtvā vajre hema ca dāpayet / (160.1) | |
| andhamūṣāgataṃ dhmātaṃ vajraṃ milati nānyathā // (160.2) | |
| kāntaṃ vajraṃ tathā guñjā gandhakaṃ ca catuṣṭayam / (161.1) | |
| stanakṣīreṇa piṣṭaṃ tu mūṣālepaṃ tu kārayet // (161.2) | |
| andhamūṣāgataṃ dhmātaṃ vajraṃ milati tatkṣaṇāt // (162.0) | |
| kṣīreṇottaravāruṇyā mṛtavajraṃ tu bhāvayet / (163.1) | |
| hemapiṣṭikayā madhye vajraṃ tatraiva nikṣipet // (163.2) | |
| veṣṭayedbhūrjapattreṇa bahirvastreṇa veṣṭayet / (164.1) | |
| dhānyamadhye tu saṃsthāpyaṃ pakṣamekaṃ nirantaram // (164.2) | |
| uddhṛtaṃ tat prayatnena vajrabandhaṃ tu kārayet / (165.1) | |
| drutā vajrāstu tenaiva melanīyāstu pārvati // (165.2) | |
| drutabandhaḥ sa vijñeyaḥ śatasāhasravedhakaḥ // (166.0) | |
| ratnānāṃ tu tathā sarvān vedhayitvā yathāvidhi / (167.1) | |
| śatasāhasravedhī ca dehasiddhipradāyakaḥ // (167.2) | |
| musalī citrakaṃ vandhyākarkoṭī kandapadminī / (168.1) | |
| kañcukī nīlasindūrī vāsā nāgabalā tathā // (168.2) | |
| kāṃsyapātre rasāścāsāṃ ratnānāṃ drutayastathā / (169.1) | |
| ātape dhārayitvā tu adhaḥ kuryādathānalam // (169.2) | |
| oṣadhīnāṃ rasaṃ kṛtvā svacchaṃ kṛtvā punaḥ punaḥ / (170.1) | |
| yāmamātraṃ ca gharme tu drutirmilati vai rasam // (170.2) | |
| na teṣāṃ krāmaṇaṃ śakyaṃ vaktuṃ varṣaśatairapi // (171.0) | |
| saindhavaṃ nimbapattrāṇi vākucī veṣṭitā nale / (172.1) | |
| drutābhrasya rasenaiva melanaṃ paramaṃ matam // (172.2) | |
| vajraṃ dvaṃdvanamīśāni vajreṇa rasamāraṇam / (173.1) | |
| sabījaṃ māraṇaṃ proktaṃ khoṭabandhanameva ca // (173.2) | |
| tanmamācakṣva deveśi kimanyacchrotumicchasi // (174.0) |
1 secs.